شعر شام علي

طالع عبالي اسكن بشجره
وبميل لو كان الغصن بيميل
وتعشعش عْصافير بالحفره
بمنقارها تقطف عسل ويسيل

ولمّا التلج بيدوب عابكره
وليل الدفا بنيسانها بيصير
اطلع عغصن ومِد بالنظرة
وانطر تا تيجي زفّة عصافير
تاخد حنين وشوق بالمرّه
وأهجر أنا هالأرض والتعتير
ويصفى القلب والروح م النّطره
لانُّه السما رح تبعت نواطير
تمسح عذاب القلب م الحسرة

وشو جاي عبالي حلم ونطير
عبلاد مافيها جنس قَهْره
ونصير نحنا بعالم التغيير
والهم ينسانا ويجي بكره
مزيّن سمانا بالفرح بكير
ويغمر عمرنا هيك كم غمره
لولا الحلم يا قلب شو بيصير
ولولا السما عم تبعت نواطير
كانت قلوب تموت ما بتدرى.
طالع عبالي اسكن بشجره.